A enfermaría é unha profesión científica, universitaria e comprometida coa cuidadanía

O Colexio Oficial de Enfermaría de Lugo reafirma o seu compromiso coa defensa da profesión enfermeira, coa seguridade dos pacientes e coa promoción dunha sanidade pública sustentada no coñecemento científico, na cooperación profesional e nos coidados de calidade. Ningunha declaración desafortunada nos vai apartar do esencial: as persoas, os seus coidados e a súa saúde.

Dende o Colexio Oficial de Enfermaría de Lugo sumámonos ao rexeitamento unánime expresado polos colexios e colectivos enfermeiros de Galicia e de todo o Estado fronte ás declaracións inadmisibles emitidas dende o Colexio de Médicos de Pontevedra. Trátase de manifestacións que faltan ao respecto a centos de miles de profesionais, e falta de rigor, que poñen en risco un dos alicerces do sistema sanitario: a confianza da cidadanía nos equipos que a coidan.

Comparar ás enfermeiras e enfermeiros con bulos ou coa intelixencia artificial é, sinxelamente, inaceptable.

Debemos lembrar, para non caer na ignorancia que a enfermaría é unha profesión universitaria, científica e regulada, cunha formación de Grao, máster, doutoramento e especialidades oficiais. Producimos coñecemento propio, publicamos en revistas científicas, lideramos investigación e somos peza clave para a seguridade do paciente, tal e como avala a literatura científica internacional. Non somos unha fonte de rumores: somos unha fonte fiable de información, baseada na evidencia.

En sanidade, o respecto entre profesións non é só un valor ético, senón tamén unha ferramenta clínica. Os equipos que traballan dende a horizontalidade e que validan a voz de cada profesional multiplican a seguridade do paciente e melloran os resultados en saúde. Estos discursos, anacrónicos, xerárquicos ou descualificadores, so debilitan o traballo en equipo e prexudican ás persoas ás que atendemos.

Por iso, dende o Colexio Oficial de Enfermaría de Lugo reafirmamos o noso compromiso coa cidadanía: seguiremos traballando, coidando e asesorando ás persoas de Lugo e de Galicia con rigor e profesionalidade, como facemos cada día nos hospitais, centros de saúde, residencias, domicilios, escolas e empresas da nosa provincia.